కేంద్ర బడ్జెట్లో తెలంగాణకు అన్యాయం జరిగిందని కాంగ్రెస్, బీఆరెస్ రాజకీయ ఆరోపణలు చేయడం మానుకోవాలని బీజేఎల్పీనేత ఏలేటి మహేశ్వర్రెడ్డి హితవు పలికారు
తెలంగాణకు మేలు కోసమే ఏపీకి 15వేల కోట్లు
పదేళ్లలో కేంద్రం 9లక్షల కోట్లు ఇచ్చింది
సభ నుంచి బీజేపీ వాకౌట్
విధాత, హైదరాబాద్ : కేంద్ర బడ్జెట్లో తెలంగాణకు అన్యాయం జరిగిందని కాంగ్రెస్, బీఆరెస్ రాజకీయ ఆరోపణలు చేయడం మానుకోవాలని బీజేఎల్పీనేత ఏలేటి మహేశ్వర్రెడ్డి హితవు పలికారు. తెలంగాణ ఏడారి కావద్దనే ఏపీకి ప్రత్యేక హోదా బదులుగా 15వేల కోట్ల నిధులు కేంద్రం బడ్జెట్లో కేటాయించిందన్నారు. ఏపీకి ప్రత్యేక హోదా ఇస్తే తెలంగాణ పరిశ్రమలన్ని ఏపీకి తరలిపోయే ఫ్రమాదముందని, ఏపీకి హోదా ఇవ్వనందుకు ప్రధాని మోదీకి తెలంగాణ ప్రజలు పాలాభిషేకం చేయాలన్నారు. కేంద్ర బడ్జెట్లో తెలంగాణకు అన్యాయంపై అసెంబ్లీలో బుధవారం జరిగిన చర్చలో ఏలేటి మహేశ్వర్రెడ్డి మాట్లాడారు. కేంద్ర బడ్జెట్లో తెలంగాణకు అన్యాయం జరిగినందునా కేంద్రమంత్రులు కిషన్ రెడ్డి, బండి సంజయ్ బీజేపీకి బానిసల్లా పని చేయొద్దని సీఎం రేవంత్ రెడ్డి చేసిన వ్యాఖ్యలపై ఏలేటి మండిపడ్డారు. మేం భారతమాత, దేశ ప్రజలకు మాత్రేమనని బానిసలమని, మీరే రాహుల్ గాంధీకి బానిసలై ఇలా మాట్లాడుతున్నారని కౌంటర్ ఇచ్చారు.
కేంద్ర ప్రభుత్వం పదేళ్లలో తెలంగాణ రాష్ట్రానికి రూ.9 లక్షల కోట్లు ఇచ్చిందని కేంద్రానికి ఏ రాష్ట్రం మీద వివక్ష ఉండదని అన్నారు. అమృత స్కీమ్ ద్వారా నిధులిచ్చారన్నారు. టెండర్లలో అక్రమాలు చేశారని ఆరోపించారు. ఈ వ్యాఖ్యలపై కాంగ్రెస్ సభ్యులు ఆగ్రహం వ్యక్తం చేశారు. అనంతరం ఏలేటి తన ప్రసంగం కొనసాగిస్తూ అసలు ఏపీ విభజన చట్టం తెచ్చింది ఎవరని, రాష్ట్రానికి అన్యాయం చేసింది ఎవరని ప్రశ్నించారు. నియమాలు, నిబంధనలు తెలిసి కూడా కాంగ్రెస్ నేతలు రాష్ట్రాన్ని వంచించారని ఆగ్రహం వ్యక్తం చేశారు. బయ్యారం స్టీల్ ప్లాంట్ ఇస్తామని విభజన చట్టంలో ఎందుకు పెట్టలేదని నిలదీశారు. బయ్యారంలో లభ్యమయ్యే ముడిసరుకు థర్డ్ గ్రేడ్ అని నివేదిక వచ్చిందని గుర్తు చేశారు. పోలవరానికి జాతీయ హోదా ఇచ్చారని అంటున్నారని.. మూసీ నది సుందరీకరణకు సంబంధించిన డీపీఆర్ కేంద్రానికి మీరు ఏమైనా ఇచ్చారా అని ప్రశ్నించారు. కేంద్ర బడ్జెట్లో అన్యాయం జరిగిందన్న అసెంబ్లీ చర్చను, తీర్మానాన్ని నిరసిస్తూ బీజేపీ సభ్యులు వాకౌట్ చేశారు.