Bheems Ceciroleo | బప్పిలహిరిని మళ్లీ భువికి రప్పించిన భీమ్స్​

మన శంకరవరప్రసాద్​ గారు టైటిల్​ గ్లింప్స్​లో వచ్చిన బ్యాక్​గ్రౌండ్​ మ్యూజిక్​ను ఈతరం సంగీత దర్శకుడు భీమ్స్​ సిసిరోలియో అలనాటి చిరంజీవి సూపర్​హిట్​ చిత్రంలోని పాపులర్​ మ్యూజిక్​ బిట్​ను ఇప్పుడు మళ్లీ కొత్తగా వినిపించాడు.

రౌడీ అల్లుడు.. మెగాస్టార్​ చిరంజీవి కథానాయకుడిగా 1991లో విడుదలైన చిత్రం. శోభన, అప్పటి సెన్సేషనల్​ హీరోయిన్​ దివ్యభారతి నాయికలుగా నటించగా, హిందీ డిస్కో మాస్టర్​ బప్పిలహిరి సంగీత దర్శకత్వం వహించిన సినిమా. చిరంజీవి ద్విపాత్రాభినయం చేసిన ఈ సినిమా చిరంజీవి మాస్​ చిత్ర చరిత్రలో ఘనవిజయాన్ని నమోదు చేసుకుంది. ఈ సినిమాలోని పాటలన్నీ సూపర్​డూపర్​ హిట్​. అందులోని లవ్​ మీ మై హీరో.. అనే పాట మొదలయ్యే మ్యూజిక్​ బిట్టే మన శంకరవరప్రసాద్​ గారులో బిజిఎంగా కొత్తగా అవతరించింది. భీమ్స్​ ఆ సంగీతపు హుషారును తగ్గించకుండా, అద్భుతంగా ఆధునీకరించాడు.

రౌడీ అల్లుడుకి ముందు బప్పిలహిరి చిరంజీవి సినిమాల్లో రెండింటికి మ్యూజిక్​ ఇచ్చాడు. అవి స్టేట్​ రౌడీ ఇంకా గ్యాంగ్​లీడర్​. గమ్మత్తేమిటంటే, గ్యాంగ్​లీడర్​, రౌడీ అల్లుడు వరుస చిత్రాలు. గ్యాంగ్​లీడర్​కు చరిత్ర తిరగరాసే సంగీతం ఇచ్చిన బప్పీ, రౌడీ అల్లుడుకి కూడా అదే స్థాయిలో ఇచ్చి, అభిమానులకు పూనకాలు తెప్పించాడు. ఈ మూడు చిత్రాలు కూడా మ్యూజికల్​గా, కమర్షియల్​గా ఘనవిజయం సాధించి చిరంజీవికి తిరుగులేని ఇమేజ్​ తెచ్చిపెట్టగా, ఆ వెంటనే వచ్చిన ఘరానా మొగుడు, తెలుగు చలనచిత్ర చరిత్ర రికార్డులను తిరగరాసి, బిగ్గర్​ దేన్​ బచ్చన్​ అనేలా చేసింది.  మెగాస్టార్​ స్థానాన్ని శాశ్వతం చేసింది.

దాదాపు పాతిక తెలుగు చిత్రాలకు సంగీతం అందించిన బప్పిలహిరి, బీట్స్​ విషయంలో కొత్త ఒరవడిని సృష్టించాడు. చిరంజీవికే కాకుండా బాలకృష్ణ, మోహన్​బాబు సినిమాలకు కూడా హిట్​ మ్యూజిక్​ ఇచ్చిన బప్పిలహిరిని మన శంకరవరప్రసాద్​ గారు టైటిల్​ సందర్భంగా బీజీఎంగా ఇచ్చారంటే, దర్శకుడు అనిల్​ రావిపూడి ఎంత పెద్ద చిరంజీవి అభిమానో అర్థం చేసుకోవచ్చు.

రౌడీ అల్లుడులోని ఆ మ్యూజిక్​ బిట్​ నిజంగా అప్పట్లో మ్యాజిక్​ చేసింది. పాట మొదలవడానికి ముందు మొదలయ్యే ఆ బీట్​ పాటంతా సాగుతుంటుంది. ఒకచోట ఇదే బిట్​ను దాదాపు 100 సెకన్లపాటు వివిధ రకాల వాయిద్యాలతో కంటిన్యువస్​గా వినిపించి, ప్రేక్షకులను మంత్రముగ్ధులను చేసాడు బప్పి. అప్పట్లో ఈ బిట్​ పెద్ద హిట్​. ఒక్కసారిగా ఈ గ్లింప్స్​లో ఆ బిట్​ కొత్తగా వినిపించేసరికి అభిమానులు వెర్రెత్తిపోయారు. ఆ అభిమానుల్లో అనిల్​ రావిపూడి కూడా ఒకరని హ్యాపీగా చెప్పొచ్చు.  ఈ తరం ప్రేక్షకులకు అప్పటి ఆ పాట ఎలా ఉందో, బప్పిలహిరి మ్యూజిక్​ మ్యాజిక్​ ఏం మాయ చేసిందో పరిచయం చేద్దాం.

రౌడీ అల్లుడులోని  లవ్​ మీ మై హీరో.. పాటను ఈ కింది యూట్యూబ్​ లింక్​లో చూడండి.