Low Rainfall 23 జిల్లాలో తక్కువ వర్షపాతం నమోదు రాష్ట్రవ్యాప్తంగా వరి సాగు 5.9 శాతమే ఈ ఏడాది తిండి గింజలకు కష్టమేనా! పొద్దు తిరుగుడు, సజ్జ విత్తనాలూ పడలేదు విధాత: రాష్ట్రంలో కరువు ఛాయలు ఏర్పడుతున్నాయి. ఈ సీజన్లో ఇప్పటి వరకు గత ఏడాది కంటే 65 శాతం తక్కువ వర్షం కురిసినట్లు తెలంగాణ స్టేట్ డెవలప్మెంట్ ప్లానింగ్ సొసైటీ (టీఎస్డీపీఎస్) తెలిపింది. ఇది సాధారణ వర్షపాతం కంటే 20 శాతం తక్కువని పేర్కొన్నది. రాష్ట్రంలో […]
Low Rainfall
విధాత: రాష్ట్రంలో కరువు ఛాయలు ఏర్పడుతున్నాయి. ఈ సీజన్లో ఇప్పటి వరకు గత ఏడాది కంటే 65 శాతం తక్కువ వర్షం కురిసినట్లు తెలంగాణ స్టేట్ డెవలప్మెంట్ ప్లానింగ్ సొసైటీ (టీఎస్డీపీఎస్) తెలిపింది. ఇది సాధారణ వర్షపాతం కంటే 20 శాతం తక్కువని పేర్కొన్నది.
రాష్ట్రంలో 23 జిల్లాల్లో సాధారణం కంటే తక్కువ వర్షం కురువగా, 10 జిల్లాల్లో మాత్రమే సాధారణ వర్షం కురిసింది. ఇలా రాష్ట్రవ్యాప్తంగా వర్షాలు అతి తక్కువగా కురియడంతో సాగు విస్తీర్ణం భారీగా తగ్గింది. రైతులు వేసిన విత్తనాలు కూడా మొలకెత్తని దుస్థితి నెలకొన్నది.
దీంతో సాగు ఖర్చులతో రైతులు తీవ్రంగా నష్టపోయే ప్రమాదం ఏర్పడింది. రాష్ట్రంలో 1.24 కోట్ల ఎకరాల సాగు విస్తీర్ణానికి 42.76 లక్షల ఎకరాల్లోనే సాగు జరిగినట్లు వ్యవసాయ శాఖ తన నివేదికలో తెలిపింది. ఇది సాగు విస్తీర్ణంలో 34.4 శాతంగా పేర్కొన్నది. ఇందులో వరి సాగు 5.9% మాత్రమేనని పేర్కొన్నది.
వ్యవసాయశాఖ నివేదిక ప్రకారం వరి సాగు విస్తీర్ణాన్ని పరిగణలోకి తీకుంటే ఈ ఏడాది తిండి గింజలకు కూడా కరువు వచ్చే ప్రమాదం ఉందని వ్యవసాయ నిపుణులు భయాందోళనలు వ్యక్తం చేస్తున్నారు. మరో వైపు రాష్ట్రంలో ప్రధాన పంటల్లో ఒకటైన పొద్దు తిరుగుడు, సజ్జ విత్తనాలు కూడా వేయలేని పరిస్థితి నెలకొన్నది. కొన్న రకాల మెట్ట పంటలకు విత్తనాలు వేసినా చాలా చోట్ల మొలకెత్తలేదు. మొలకెత్తినవి కూడా సరైన వర్షంలేక చాలా చోట్ల మొలకలు ఎత్తైనట్లు సమాచారం.
వర్షాకాలం సీజన్లో నెల గడిచినా.. తగిన వర్షాలు లేక కృష్ణా, గోదావరి నదుల్లో వరద నీటి ప్రవాహం మొదలు కాలేదు. ప్రధాన రిజర్వాయర్లు నిండుకున్నాయి. దీంతో ప్రధాన ఆయకట్ల కింద వరి నారు కూడా పోయని పరిస్థితి ఏర్పడింది. బోరు బావుల కిందనే వరి సాగు చేస్తున్నట్లు పరిస్థితిని పరిశీలిస్తే అర్థమవుతున్నది.
పంజాబ్ తరువాత దేశవ్యాప్తంగా బియ్యం ఎగుమతులు చేసిన తెలంగాణ ఈ ఏడాది తిండి గింజలకు ఇబ్బంది పడే పరిస్థితి ఏర్పతుందా? అన్న సందేహాలు వ్యక్తం చేస్తున్నారు. వర్షాలు సరిగా కురువక పోవడంతో భూగర్భ జలాలు కూడా పడిపోయే ప్రమాదం ఉందని నిపుణులు హెచ్చరిస్తున్నారు. భూగర్భ జలాలు పడిపోతే బోర్ల కింద సాగు కూడా తగ్గే ప్రమాదం ఉందంటున్నారు.
వర్షాభావ పరిస్థితులతో ప్రధాన రిజర్వాయర్లు అడుగంటాయి. కృష్ణా బేసిన్లోని శ్రీశైలం ప్రాజెక్ట్.. 215.807 టీఎంసీలకు గాను 33.7648 టీఎంసీల నీటితో డెడ్ స్టోరేజీలో ఉంది. జూరాల, సుంకేశుల, హంద్రీ నీవా ప్రాజెక్ట్లకు ఎగువ నుంచి చుక్క వరద నీరు రావడం లేదు. ప్రధాన జలాశయమైన నాగార్జున సాగర్లో 312.5050 టీఎంసీలకు గాను 146 టీఎంసీల నీరు మాత్రమే ఉంది.
డెడ్ స్టోరేజీలో నీరు ఉండటంతో సాగునీరు ఇవ్వలేని పరిస్థితి నెలకొన్నది. గోదావరి బేసిన్ను పరిశీలిస్తే శ్రీరాం సాగర్ ప్రాజెక్ట్కు వరద నీరు చుక్కకూడా రావడం లేదు. శ్రీరాంసాగర్లో 90.31 టీఎంసీలకు కేవలం 23.60 టీఎంసీల నీరు మాత్రమే ఉంది. నిజాం సాగర్ ప్రాజెక్ట్లో 17.80 టీఎంసీలకు 3.05 టీఎంసీల నీరు మాత్రమే ఉన్నది.
తెలంగాణ, ఏపీలోని మొత్తం రిజర్వాయర్లన్నింటిలో కలిపి 833.13 టీఎంసీల నీటి నిల్వలకు గాను ప్రస్తుతం 285. 83 టీఎంసీల నీటి నిల్వలు మాత్రమే ఉండటం గమనార్హం.