Summer Drinks: ఎండాకాలంలో తాగాల్సిన డ్రింక్స్.. అస్సలూ మిస్ చేయకండి

ఎండాకాలంలో ఒత్తిడి, దాహం, అలసట సాధారణం. పొడిబారిన వాతావరణం, అధిక ఉష్ణోగ్రతల వల్ల శరీరం నీటిని కోల్పోతుంది. దీనివల్ల డీహైడ్రేషన్, తలనొప్పి, నీరసం, జీర్ణ సమస్యలు వచ్చే అవకాశం ఉంది. వేడి రోజులను అధిగమించడానికి కొన్ని సహజమైన ఆరోగ్య పానీయాలు శరీరానికి తేమను అందించి వేడి నుంచి ఉపశమనం కలిగిస్తాయి.

వేసవిలో తాగాల్సిన ఆరోగ్యకరమైన పానీయాలు:

నిమ్మరసం:
నిమ్మకాయలో విటమిన్ C పుష్కలంగా ఉంటుంది. ఇది శరీరానికి రోగనిరోధక శక్తిని అందిస్తుంది. ఎండాకాలంలో ఒక గ్లాసు నీటిలో నిమ్మరసం, చిటికెడు ఉప్పు, కొద్దిగా చక్కెర కలిపి తాగితే శరీరానికి తక్షణ శక్తి లభిస్తుంది. ఇది శరీరంలోని ఎలక్ట్రోలైట్లను సమతుల్యం చేస్తుంది.

జల్ జీర:
జీలకర్రతో తయారయ్యే జల్ జీర పానీయం వేసవిలో తాగడానికి చాలా బాగుంటుంది. ఇది జీర్ణ వ్యవస్థను మెరుగుపరుస్తుంది. ముఖ్యంగా ఉబ్బరం, వాంతులు, అజీర్ణం వంటి సమస్యలకు ఇది మంచి పరిష్కారంగా పని చేస్తుంది. దీనిలో యాంటీ ఆక్సిడెంట్లు కూడా ఉన్నాయి. ఇవి శరీరాన్ని చల్లబరుస్తాయి.

ఆమ్ పన్నా: కాచిన మామిడికాయలతో చేసే ఆమ్ పన్నా వేసవిలో తాగితే వడదెబ్బను నివారించవచ్చు. దీనిలో విటమిన్ సి, ఐరన్, ఇతర ఖనిజాలు ఉంటాయి. దీనిని తాగడం వల్ల దాహం తగ్గి, శక్తి పెరుగుతుంది.

కొబ్బరి నీరు: కొబ్బరి నీళ్లు శరీరానికి తేమను అందిస్తాయి. ఇందులో పొటాషియం, సోడియం వంటి ఖనిజాలు పుష్కలంగా ఉంటాయి. వేసవిలో ఒక గ్లాసు కొబ్బరి నీరు తాగితే శరీరం హైడ్రేట్‌గా ఉంటుంది. జీర్ణ సమస్యలు కూడా తగ్గుతాయి.

మజ్జిగ: పాల నుండి వచ్చే మజ్జిగలో ప్రోబయోటిక్స్ ఎక్కువగా ఉంటాయి. ఇవి జీర్ణక్రియను మెరుగుపరుస్తాయి. వేసవిలో రోజుకు ఒక్కసారైనా మజ్జిగ తాగడం వల్ల పొట్ట తేలికగా ఉంటుంది. శరీరం చల్ల బడుతుంది. దాహం కూడా తగ్గుతుంది.

సత్తు షర్బత్: సత్తుతో తయారయ్యే షర్బత్‌లో ప్రోటీన్, న్యూట్రియెంట్లు అధికంగా ఉంటాయి. ఇది శరీరానికి అవసరమైన శక్తిని అందిస్తుంది.దీన్ని ఉదయం లేదా మధ్యాహ్నం తాగితే శరీరం శక్తివంతంగా  ఉంటుంది. వేడి నుండి రక్షణ లభిస్తుంది.

చెరకు రసం: తాజా చెరకు రసం తాగడం వల్ల శరీరానికి ఉపశమనం లభిస్తుంది. ఇది లివర్ ఆరోగ్యానికి మేలు చేస్తుంది. వేసవిలో వచ్చే నీరసం, డీహైడ్రేషన్ వంటి సమస్యలపై చెరకు రసం సహాయ పడుతుంది.

పుచ్చకాయ రసం: పుచ్చకాయలో 90 శాతం వరకు నీరు ఉంటుంది. దీనిని జ్యూస్ రూపంలో తాగితే శరీరం తేమగా అనిపిస్తుంది. ఇందులో విటమిన్లు, యాంటీ ఆక్సిడెంట్లు పుష్కలంగా ఉండటంతో చర్మం కాంతివంతంగా మారుతుంది. వేడి నుండి రక్షణ లభిస్తుంది.