Asia Cup 2025 | ఆసియాకప్​ ఫైనల్లో భారత్​ – బంగ్లాపై అలవోక విజయం

దుబాయిలో జరుగుతున్న ఆసియాకప్​ సూపర్​ 4 మ్యాచ్​లో భారత్​ 41 పరుగుల తేడాతో విజయం సాధించి ఫైనల్లోకి దూసుకెళ్లింది. నేడు జరుగబోయే పాక్​–బంగ్లాల మధ్య విజేతలో ఫైనల్​ పోరు

Asia Cup 2025 | ఊహించినట్లుగానే, భారత్​ తన రెండో సూపర్​ 4 మ్యాచ్​లో బంగ్లాదేశ్​పై విజయం సాధించి ఆసియాకప్​ ఫైనల్లో ప్రవేశించింది. ఇంతకుముందు మ్యాచ్​లో చిరకాల ప్రత్యర్థి పాకిస్తాన్​ను మట్టికరిపించిన టీమిండియా, నేడు బంగ్లాదేశ్​పై గెలిచి  నాలుగు పాయింట్లలో టేబుల్​ టాపర్​గా నిలిచి, ఫైనల్​ అవకాశాలను మెరుగుపరుచుకుంది. తొలుత టాస్​ ఓడి బ్యాటింగ్​ చేసిన భారత్​ నిర్ణీత 20 ఓవర్లలో 6 వికెట్ల నష్టానికి 168 పరుగులు చేసింది. ఒకవిధంగా భారత్​ బ్యాటింగ్​లో విఫలమైనట్లే. షరామామూలుగా అభిషేక్​ శర్మ(75 పరుగులు: 37 బంతులు, 6 ఫోర్లు, 5 సిక్స్​లు ) సగం స్కోరు చేయగా, మిగతావారు ఇలా వచ్చి అలా వెళ్లారు. ఒక్క హార్థిక్​(38 పరుగులు: 29 బంతులు, ఒక సిక్స్​, 4 ఫోర్లు) మళ్లీ నిలదొక్కుకుని భారత్​కు ఆ మాత్రమైనా గౌరవప్రదమైన స్కోరు ఇచ్చాడు. అభిషేక్​ వీరవిహారం దుబాయ్​ మైదానాన్ని మళ్లీ అదిరేలా చేసింది. సిక్స్​లు, ఫోర్లతో విరుచుకుపడ్డ ఈ యువ ఓపెనర్​, పాక్​తో మ్యాచ్​లోలాగే చెలరేగిపోయాడు. లేని పరుగుకు రనౌటయ్యాడు గానీ, లేకపోతే భారత్​ స్కోరు తీజీగా 200 దాటేది.

ఆ తర్వాత బ్యాటింగ్​కు దిగిన బంగ్లాదేశ్​ ధాటిగానే ఆడినా, క్రమం తప్పకుండా వికెట్లు కోల్పోవడం వారిని దెబ్బతీసింది. ఓపెనర్​ సైఫ్​ హస్సన్​(69 పరుగులు, 5 సిక్స్​లు, 3 ఫోర్లు) తప్ప మిగతావారందరూ తేలిపోవడంతో బంగ్లా 19.3 ఓవర్లకు 127 పరుగులకు ఆలౌట్​ అయింది.  భారత బౌలర్లలో కుల్​దీప్​ 3, బుమ్రా, వరుణ్​ చెరో రెండు, అక్షర్​ పటేల్​, తిలక్​వర్మ తలా ఒక వికెట్ తీసుకున్నారు. అభిషేక్​ శర్మ వరుసగా రెండోసారి మ్యాన్​ ఆఫ్​ ది మ్యాచ్​గా ఎంపికయ్యాడు.