VISHWAMBHARA | చిరంజీవి సినిమాకు నాగ్​అశ్విన్​..?

మెగాస్టార్​ చిరంజీవి(Megastar chiranjeevi) సినిమాల లైనప్​ ఇప్పుడు మామూలుగా లేదు. పసలేని గ్రాఫిక్స్​ పుణ్యమా అని ట్రోలింగ్​ బారిన పడి, విడుదల వాయిదాపడిన ఆయన తాజా చిత్రం ‘విశ్వంభర’ ఇప్పుడు రిపేర్​ పనులు చేసుకుంటోంది.

విశ్వంభర (Vishwambhara)– అప్పుడెప్పుడో అంజి(Anji) తర్వాత మళ్లీ చిరంజీవిని పురాణేతిహాసాల నేపథ్యంలో కథానాయకుడిగా చూపించే ప్రయత్నం. అప్పుడు గ్రాఫిక్స్​లో ఇప్పుడున్నంత సాంకేతికత లేకపోయినా, దర్శకుడు కోడి రామకృష్ణ దాన్ని తీసిన తీరు అమోఘం. సినిమా పెద్దగా ఆడకపోయినా, పేరు మాత్రం బాగానే వచ్చింది. ప్రస్తుతం గ్రాఫిక్స్​ యుగం. రాజమౌళి, నాగ్​అశ్విన్​, సుకుమార్​, శంకర్​ లాంటి సాంకేతిక జ్ఞానం ఉన్న దర్శకులు సినిమాల్లో సిజి(Computer Graphics) ద్వారా కొత్త లోకాలను చూపిస్తున్నారు. అదే కోవకు చెందింది ఈ విశ్వంభర.

బింబిసార(Bimbisara)తో ఒక్కసారిగా వెలిగిపోయిన ఈ దర్శకుడు మల్లిడి వశిష్ట(Mallidi Vasishta) తన రెండో సినిమాకే మెగాస్టార్​ను ఒప్పించగలిగాడంటే కథ ఎంతో ఘనంగా ఉండేఉంటుంది. దాన్ని తెరమీద అద్భుతంగా ఆవిష్కరించగలిగే గ్రాఫిక్స్​ అవసరం. అదే సినిమాకు పెద్ద చిక్కు తెచ్చిపెట్టింది. టీజర్​ విడుదల చేసినప్పుడు పేలవంగా(Dull graphics) ఉన్న గ్రాఫిక్ వర్క్​ను చూసి అందరూ పెదవి విరిచారు. ముఖ్యంగా చిరంజీవి అభిమానులు సోషల్​ మీడియాలో తీవ్రంగా విరుచుకుపడ్డారు. దాంతో నష్టనివారణ చర్యలు చేపట్టడానికి నిర్మాణ సంస్థ నడుం బిగించింది. చిరంజీవి కూడా ఈ విషయంలో సీరియస్​గా ఉండటం, దర్శకుడికి గొంతులో వెలక్కాయ పడ్డట్టయింది. ఈ నేపథ్యంలో హుటాహుటిన గ్రాఫిక్స్​ కంపెనీని తీసేసిన దర్శకుడు ఈసారి పెద్ద ఎత్తున ఆలోచించాడు. ఆ విధంగా ఆలోచించాల్సిందిగా, బడ్జెట్​పై ఎటువంటి పరిమితులు లేవని నిర్మాతలు యువీ క్రియేషన్స్​(UV Creations) ఆయనకు హామీ ఇవ్వడంతో ఏకంగా అవతార్​ (Avatar)సినిమాకు గ్రాఫిక్స్​ చేసిన కంపెనీని సంప్రదించారు. వెటా ఎఫెక్స్​( Wētā FX) అనే కంపెనీ అవతార్​కు పనిచేసింది. దాన్నే సంప్రదించినట్లు విశ్వసనీయ సమాచారం.

ఈ నేపథ్యంలోనే చిరంజీవి సలహాతో ‘కల్కి 2898 ఏడీ’(Kalki 2898AD) చిత్రం ద్వారా గ్రాఫ్​క్స్​లో విశ్వరూపం చూపించిన దర్శకుడు నాగ్​అశ్విన్​ (Nag Ashwin) సంప్రదించాడట. ఈ విషయమై చిరంజీవి నాగ్​అశ్విన్​తోనూ, నిర్మాత, ఆయన మామ అశ్వనీదత్​తోనూ స్వయంగా మాట్లాడగా వారు సంతోషంగా అంగీకరించినట్లు తెలిసింది. దాంతో నాగ్​అశ్విన్​ విశ్వంభరలోకి ప్రవేశించి తన సినిమాకు పనిచేసిన సిజీ టీమ్​ను రప్పించి, వెటా ఎఫెక్స్​ సలహాలతో గ్రాఫిక్స్​ను తిరగి అద్భుతంగా రూపొందిస్తున్నట్లు తెలిసింది.

ప్రస్తుతం శరవేగంగా సిజివర్క్​ జరుపుకుంటున్న విశ్వంభర షూటింగ్​లో ఒక్క పాట మాత్రం పెండింగ్​ ఉన్నట్లు, అది కూడా త్వరలోనే కంప్లీట్​ కానున్నట్లు చిత్రబృందం తెలిపింది. అందరూ ఓ మాటనుకుని, చివరికి ఆగస్టు 22, 2025 మెగాస్టార్ జన్మదినాన విడుదలకు ముస్తాబవుతోంది. చిరంజీవి సరసన త్రిష(Trisha Krishnan) హీరోయిన్​గా, కీరవాణి(MM Keeravani) సంగీత దర్శకుడిగా, మీనాక్షి చౌదరి, అషికా రంగనాథ్, సురభి, ఇషా చావ్లా ఇతర ముఖ్య పాత్రల్లో నటిస్తున్నారు. యువీ క్రియేషన్స్​ బ్యానర్​పై ప్రమోద్​, వంశీ, విక్రమ్​ ఈ సినిమాను నిర్మిస్తున్నారు.