KTR | జాబ్ క్యాలెండర్ పెద్ద బోగస్‌..నిరుద్యోగులను కాంగ్రెస్ మోసం చేస్తుందన్నకేటీఆర్‌

కాంగ్రెస్ ప్రభుత్వం జాబ్ క్యాలెండర్ పెద్ద బోగస్ అని, నిరుద్యోగ యువతను మభ్య పెడుతోందని బీఆరెస్ వర్కింగ్ ప్రెసిడెంట్ కేటీఆర్ విమర్శించారు. జాబ్ క్యాలెండర్‌లో పోస్టుల సంఖ్య పెట్టలేదంటూ అసెంబ్లీ ఎదుట ఉన్న గన్ పార్కు

విధాత, హైదరాబాద్ : కాంగ్రెస్ ప్రభుత్వం జాబ్ క్యాలెండర్ పెద్ద బోగస్ అని, నిరుద్యోగ యువతను మభ్య పెడుతోందని బీఆరెస్ వర్కింగ్ ప్రెసిడెంట్ కేటీఆర్ విమర్శించారు. జాబ్ క్యాలెండర్‌లో పోస్టుల సంఖ్య పెట్టలేదంటూ అసెంబ్లీ ఎదుట ఉన్న గన్ పార్కు వద్ధ బీఆరెస్ ఎమ్మెల్యేలు, ఎమ్మెల్సీలు నిరసనకు దిగారు. ప్రభుత్వానికి వ్యతిరేకంగా, జాబ్ క్యాలెండర్ బోగస్ అని, పెద్ద మోసమని నినాదాలు చేశారు. ఈ సందర్భంగా కేటీఆర్ మాట్లాడుతూ నిరుద్యోగ యువతను మభ్యపెట్టి ఎక్కవ రోజులు ప్రభుత్వాన్ని నడపలేరని, మీరిచ్చిన జాబ్ క్యాలెండర్ బోగస్ అని మీకు తెలుసని, యువతను కాంగ్రెస్ మోసం చేస్తోందని కేటీఆర్ మండిపడ్డారు. జాబ్ క్యాలెండర్‌పై అసెంబ్లీలో చర్చించాలని అడిగితే రెండు నిమిషాలు కూడా టైమ్ ఇవ్వలేదన్నారు. నాలుగు పేపర్ల మీద ఇష్టం వచ్చింది రాసుకొచ్చి జాబ్ క్యాలెండర్ అంటున్నారని విమర్శించారు. తెలంగాణ శాసనసభ దుశ్శాసనసభగా మారిందని ధ్వజమెత్తారు. “నిరుద్యోగులను రెచ్చగొట్టి కాంగ్రెస్ గెలిచిందని, అధికారంలోకి వచ్చాక జాబ్ క్యాలెండర్ ఇస్తామని ప్రకటనలు చేశారని గుర్తు చేశారు. కాంగ్రెస్ అగ్రనేత రాహుల్‌గాంధీ అశోక్ నగర్‌కు వచ్చి 2లక్షల ఉద్యోగాలు ఇస్తానన్నారని ఎక్కడని ప్రశ్నించారు. సీఎం రేవంత్ రెడ్డి ఏటా 2లక్షల ఉద్యోగాలని చెప్పారని, కొత్తగా ఎన్ని ఉద్యోగాలు ఇచ్చారని ప్రశ్నించారు. దమ్ముంటే రాహుల్ గాంధీ, రేవంత్ రెడ్డిలు అశోక్ నగర్ కు రావాలని, మేమంతా కూడా వస్తామని, అశోక్ నగర్ లో విద్యార్థులు మీరు ఒక్క ఉద్యోగం ఇచ్చినట్లు చెప్పిన సరే మేమంతా రాజీనామా చేస్తామన్నారు. రేవంత్ మాట్లాడితే నువ్వు మగాడివైతే అంటాడని, ఆయన మగాడైతే సిటి సెంట్రల్ లైబ్రరీకి రావాలని, మీరు అక్కడికి వస్తే విద్యార్థులు మిమ్మల్ని తన్ని తరిమేస్తారన్నారు.

సీఎం రేవంత్‌రెడ్డి నిరుద్యోగులతో గొక్కుంటున్నారు

సీఎం రేవంత్ రెడ్డి ఎవరితో గోక్కోకూడదో వారితో గొక్కున్నారని కేటీఆర్ విమర్శించారు. తెలంగాణ యువత తరపున పోరాడుతుంటే మమ్మల్ని తిడుతున్నారని, అనర్హత వేటు ఎదుర్కొంటున్న దానం నాగేందర్‌కు మైక్ ఇచ్చి తిట్టించారని కేటీఆర్ మండిపడ్డారు. మీ జాబ్ క్యాలెండర్ నిజమైతే అందులో 2 ఉద్యోగాలు కూడా ఎందుకు పెట్టలేదని కేటీఆర్ ప్రశ్నించారు. మందికి పుట్టిన బిడ్డలను మా బిడ్డలంటూ మేము ఇచ్చిన 30 వేల ఉద్యోగాలను మీరిచ్చిన ఉద్యోగాలని చెప్పుకుంటున్నారని విమర్శించారు. నిన్న రాత్రి జీవో నంబర్ 46 ను సవరించాలంటూ దిల్ సుఖ్ నగర్ లో అభ్యర్థులు పెద్ద ఎత్తున ఆందోళన చేశారని, అటు బిల్లుల కోసం 1800 మంది సర్పంచులు సచివాలయం ముట్టడిస్తే వారిని అరెస్ట్ చేశారని, మార్పు, మార్పు అంటూ నిరుద్యోగులను మభ్య పెట్టే ప్రయత్నం చేస్తున్నారని ఆరోపించారు. సీఎం రేవంత్ రెడ్డి ఎవరితో గోక్కోకూడదో వారితో గొక్కున్నారన్నారు. రేవంత్ రెడ్డి ఒక శాడిస్ట్ మా ఆడబిడ్డలను, మా ఎమ్మెల్యేలలను తిట్టిస్తూ పైశాచిక ఆనందం పొందుతున్నాడని, ఇవాళ తెలంగాణ శానస సభలో చీకటి రోజని, దానం నాగేందర్ బజారు బాష వినలేక మేము అక్కడ ఉండవద్దని వచ్చేశామన్నారు. తెలంగాణ యువత తరఫున మేము ప్రభుత్వాన్ని ప్రశ్నిస్తే ఇంత బజారు భాషలో మమ్మల్ని తిట్టిస్తారా? అని, ఇంత దిగజారుడు, దివాళా కోరు ముఖ్యమంత్రిని ఎప్పుడు చూడలేదని, కాంగ్రెస్ వాళ్లను ఎక్కడికక్కడ కొట్టాలన్నారు. గ్రూప్ 1, గ్రూప్-2, గ్రూప్ 3 లో ఉద్యోగాల సంఖ్య పెంచుతామని హామీ ఇచ్చారని, గ్రూప్- 1 లో 1: 100 పిలవాలంటే తప్పించుకున్నారని, జీవో నంబర్ 46 ను సవరిస్తామని హామీ ఇచ్చి అధికారంలోకి వచ్చారన్నారు. హైదరాబాద్ విషయంలో సభలో తప్పుడు ప్రచారం చేశారని, రాష్ట్రం అప్పుల పాలైందంటూ తప్పుడు కూతలు కూశారని, ఈ రాష్ట్రం సంపద గల రాష్ట్రమని మేము లెక్కలతో చెప్పే సరికి చేసేదేమీ లేక సైలెంట్ అయ్యారన్నారు. తప్పుడు సమాచారంతో తప్పుదోవ పట్టించే చిల్లర ప్రయత్నం చేస్తున్న చిల్లర ముఖ్యమంత్రి రేవంత్ రెడ్డి అన్నారు. కాంగ్రెస్ చేస్తున్న డ్రామాలు ఇకనైనా ప్రజలు అర్థం చేసుకోవాలని, ఆరు నూరైనా వందరోజుల్లో గ్యారంటీలు అన్నారని, కానీ ఇప్పటి వరకు హామీలను అమలు చేయలేదని, అందుకే ప్రభుత్వానికి వ్యతిరేకంగా నిరసన తెలుపుతున్నామన్నారు.