YS Sharmila| సూపర్ సిక్స్ – సూపర్ ఫ్లాప్ : వైఎస్.షర్మిల

ఏపీ కూటమి సూపర్ సిక్స్ హామీలు అసంపూర్ణం, అమలు చేయకుండానే సక్సెస్ సభలు జరపడం హాస్యాస్పదమని వైఎస్ షర్మిల తీవ్ర విమర్శ.

అమరావతి: సూపర్ ఫ్లాప్(Super Flop) అయిన సూపర్ సిక్స్( Super Six Promises)ను సూపర్ హిట్ అని కూటమి పార్టీల ప్రభుత్వం(Andhra Pradesh Government)చెప్పుకోవడం సిగ్గుచేటు అని…సూపర్ సిక్స్ హామీలు అమలు చేశామని అప్పుడే సక్సెస్ సభలు జరపడం హాస్యాస్పదం అని ఏపీ కాంగ్రెస్ చీఫ్(AP Congress) వైఎస్.షర్మిల(YS Sharmila) మండిపడ్డారు. సూపర్ సిక్స్ హామీల్లో ఒక్కటైనా పూర్తిగా అమలు చేశారా ? రాష్ట్రంలో 50 లక్షల మంది నిరుద్యోగ బిడ్డలు ఉంటే ఒక్కరికైనా 3 వేల నిరుద్యోగ భృతి ఇచ్చారా ? 20 లక్షల ఉద్యోగాలు ఎక్కడ ? స్థాపించని పరిశ్రమలతో అగ్రిమెంట్లు చేసుకున్నంత మాత్రానా ఉద్యోగాలు ఇచ్చినట్లా ? ఒక్కరికి భృతి ఇవ్వకుండా, ఒక్క ఉద్యోగం రాకుండా సూపర్ సిక్స్ సూపర్ హిట్ ఎలా అయ్యింది ? అంటూ ఎక్స్ వేదికగా షర్మిల ప్రశ్నించారు.

సూపర్ సిక్స్ హామీ 18 ఏళ్లు నిండిన ప్రతి మహిళకు నెలకు 15 వందలు ఆర్థిక సహాయాన్ని కూటమి ప్రభుత్వం ఏర్పడిన 15 నెలల్లో ఒక్క మహిళకైనా ఇచ్చారా ? ఇదేనా సూపర్ సిక్స్ సూపర్ హిట్ అంటే ? అని షర్మిల నిలదీశారు. అన్నదాత సుఖీభవ కింద సొంతగా 20 వేలు ఇస్తామని మాట మార్చారు. కేంద్రం ఇచ్చే 6 వేలతో లింక్ పెట్టారు. కేవలం 44 లక్షల మంది రైతులకు ఒక విడత 7 వేలు ఇచ్చి.. 30 లక్షల మంది రైతులకు పథకం దక్కకుండా పంగనామాలు పెట్టారు. హామీల్లో సగానికి సగం కోత పెట్టడాన్ని సూపర్ హిట్ అంటారా ? అని మండిపడ్డారు.

సూపర్ సిక్స్ అసంపూర్ణం

తల్లికి వందనం పథకం కింద 87 లక్షల మంది బిడ్డలు ఉంటే.. కేవలం 67 లక్షల మందికి 13 వేలు ఇచ్చి, 20 లక్షల మంది బిడ్డలకు పథకంలో కోత పెట్టారని.. మూడు సిలిండర్లు ఎంత మందికి ఇస్తున్నారో తెలియదని షర్మిల విమర్శించారు. 14 నెలల తర్వాత ఫ్రీ బస్సు అమలు చేసి, సూపర్ సిక్స్ సూపర్ హిట్ అంటూ చెప్పుకుంటుంటే ప్రజలు నవ్వుతున్నారని… గోరంత చేసి కొండంత చెప్పుకోవడం నిజంగా కూటమి ప్రభుత్వానికే చెల్లుతుందని ఎద్దేవా చేశారు.

సూపర్ సిక్స్ హామీల సంగతి దేవుడెరుగు.. ఇచ్చిన మిగతా హామీలు సైతం మోసమేనని షర్మిల మండిపడ్డారు. ప్రతి ఏటా జనవరిలో జాబ్ క్యాలెండర్ , బీసీలు,ఎస్సీ ఎస్టీ,మైనారిటీలకు 50 ఏళ్లకే పెన్షన్, సబ్సిడి కింద వ్యవసాయానికి సాయం, ధరల స్థిరీకరణ నిధి, ఇల్లు లేని పేదలకు 2 నుంచి 3 సెంట్లు భూమి, పెండింగ్ ప్రాజెక్టుల పూర్తి, ఫీజు రీయింబర్స్, ఆరోగ్య శ్రీ బకాయిల చెల్లింపు, విద్యుత్ ఛార్జీల నియంత్రణ, పెట్రోల్ డీజిల్ ధరల తగ్గింపు, జర్నలిస్టులకు ఉచిత నివాస స్థలం, ఇలాంటి మానిఫెస్టో ప్రధాన హామీల్లో ఒక్కటైనా అమలు చేశారా ? అని..దీనిపై సీఎం చంద్రబాబు సమాధానం చెప్పాలని డిమాండ్ చేశారు.