పెద్దలు చూడాల్సిన పిల్లల సినిమా ‘బాలక్ అండ్ పాలక్’

విధాత‌: సైన్స్ చెప్పినట్టు మనిషి ఏకకణ జీవి అమీబా నుంచి పరిణామం చెందాడా లేక మత గ్రంథాలలో చెప్పినట్టు మానవుడు ఉద్భ‌వించాడా? ఏమో ఎవరికి తెలుసు? తెలుసుకున్నా చేసేదేముంది కనక. తొలి మానవుడు ఎలా ఉద్భ‌వించాడో తెలియదు కానీ మలి మానవుడు మాత్రం ప్రత్యుత్పత్తి ద్వారా అని అందరికీ తెలుసు. జీవపరిణామం అనే పాఠంలో జాతులు, ప్రజాతులు, చెట్లు.. కీటకాలు.. ఉభయచరాలు… జలచరాలు, సరీసృపాలు, గుడ్లుపెట్టే జీవులూ, క్షీరదాలు అనే పాఠాలతో మొదలయ్యి ఏ రకం జీవులు […]

విధాత‌: సైన్స్ చెప్పినట్టు మనిషి ఏకకణ జీవి అమీబా నుంచి పరిణామం చెందాడా లేక మత గ్రంథాలలో చెప్పినట్టు మానవుడు ఉద్భ‌వించాడా? ఏమో ఎవరికి తెలుసు? తెలుసుకున్నా చేసేదేముంది కనక. తొలి మానవుడు ఎలా ఉద్భ‌వించాడో తెలియదు కానీ మలి మానవుడు మాత్రం ప్రత్యుత్పత్తి ద్వారా అని అందరికీ తెలుసు.

జీవపరిణామం అనే పాఠంలో జాతులు, ప్రజాతులు, చెట్లు.. కీటకాలు.. ఉభయచరాలు… జలచరాలు, సరీసృపాలు, గుడ్లుపెట్టే జీవులూ, క్షీరదాలు అనే పాఠాలతో మొదలయ్యి ఏ రకం జీవులు ఎలా ప్రత్యుత్పత్తి జరిపి పిల్లలని కంటాయో అనేది పాఠ్యాంశాల్లో పెట్టారు.

ఉమ్మెత్త పువ్వు ఫల‌దీకరణం, మొక్కల అంటుకట్టు విధానం, కప్పల ప్రత్యుత్పత్తి, దోమల ఎదుగుదల, చిక్కుడు గింజ మెలకెత్తే సంగతీ, చివరికి మానవ ప్రత్యుత్పత్తి విధానం అన్నీ తరగతిలో చదువుకున్నాం. అదంతా చదువు, ఆ యేడు ప్రశ్న జవాబులకి పనికొస్తుంది.

మిగితాజీవుల్లా కాకుండా ప్రత్యుత్పత్తి విధానాన్ని ఒక అసంకల్పిత.. కాలానుగుణ శారీరక చర్యలా కాకుండా భావోద్రేకంతో.. మోహంతో.. కాంక్షతో.. కళాదృష్టితో.. అర్పణతో సుఖపారవశ్యం + మానసిక మహదానందం చెందటానికీ ఉపయోగపడే సహజ చర్య గా చేసుకోగలిగాడు.

ఈ విషయంలో మాత్రం మానవ జీవితం చాలా గొప్పది.. ఆనందదాయకమైనదీ.. ఉత్తమమైనదీ అని మాత్రం చెప్పవచ్చు. మనకి విషయం తెలిసినా తెలియకున్నాఆ అనుభవించటం. ఆనందించటం ఆగనిది. ఎందుకంటె అదొక సహజాత ప్రోద్భలం. సహజ చర్య కనుక ఏదో విధానం తెలుస్తుంది, తెలుసుకుంటాం, జరిగిపోతుంటుంది. అయితే సరైన పద్ధ‌తుల్లో తెలుసుకోవటం ద్వారా జీవితాన్ని కోల్పోకుండా చక్కగా ఎక్కువగా ఆనందించగలుగవచ్చు.

కూడూ, గూడు, గుడ్డ అనేవి ప్రాథ‌మిక అవసరాలుగా చెప్పుకుంటాం. అయితే కేవలం వాటితో సరిపోదు మనిషికి. అవి ఎల్లకాలం అవసరమే అయినప్పటికీ. మధ్యలో వయసు పెరుగుదలతో పాటు కావలసిన శారీరక మానసిక ప్రోద్బలాలు కూడా అవసరాలే. వాటిల్లో కామం శారీరకమైతే స్నేహం మానసికమైనది.

బయోలాజికల్‌గా పదమూడు పద్నాలుగు సంవత్సరాల వయసు అతి క్లిష్టమయినది అని అందరూ చెపుతారు. ఎందుకంటే.. శారీరక ఎదుగుదల ఒకవైపు.. మానసికంగా ఎదిగి వ్యక్తిత్వాన్ని సంతరించుకునే సమయం మరోవైపూ. శారీరక ప్రోద్బలాలు ఇంకొకవైపూ, ప్రపంచపు పారడియం షిఫ్ట్ మరోవైపు ఇలా రకరకాల కోణాల్లో జీవితం విస్తరించే సమయం.

ఈ వయసు రాగానే లైంగిక హార్మోనుల ఉత్పత్తి జరిగి కౌమారదశ నుంచి య‌వ్వ‌నంలోకి అడుగుపెట్టి అన్ని అవయవాలు సంపూర్ణత్వాన్ని సంతరించుకుని.. శారీరకంగా ఎదుగుతారు. అన్నాళ్ళూ చెప్పినమాట వింటూ, పెద్దల దృక్పథంలోనే లోకాన్ని చూస్తున్న వాళ్లు స్వంత దృక్పథం మొదలయ్యి మెల్లిగా ప్రశ్నించటం మొదలు అవుతుంది.

ప్రపంచంలో ఏదీ సరిగ్గా ఉన్నట్టు తోచదు. అప్పటివరకూ ఉన్న నమ్మకాలు పటాపంచలయ్యి తమ అనుభవ పూర్వక నమ్మకాలని కల్పించుకోజూస్తారు. వ్యక్తిగా ఎదగటానికి వ్యక్తిత్వాన్ని సంతరించుకునే తొలి దశలో ఉంటారు. సరిగ్గా ఇప్పుడే అవతలి వ్యక్తి మీద (opposite sex) కూడా ‘కోరిక’, కుతూహలం కలుగుతుంది.

కామం ఏమిటి.. ఎందుకూ అని తెలుసుకోవాలనే కుతూహలానికి తోడు.. కోరిక లోపలి నుంచి కలిగించే ఆరాటం, అవతలి వ్యక్తిని ఆకర్షించాలన్న తప‌న మొదలవుతుంది. ఆ ఉత్సుకతలో ఒక్కొక్కొరు ఒక్కోదారి ఎంచుకుంటారు.

భయం వల్లో… తప్పు అన్న ఫీలింగ్ వల్లో మొదట్లో ప్రత్యక్ష అనుభవానికంటే పరోక్ష అనుభవానికి ప్రయత్నిస్తారు. అందులో భాగంగానే కామ ప్రవృత్తికి సంబంధించిన పుస్తకాలు.. సినిమాలు వీటికి చూడటానికి ఎగబడతారు.

పల్లెటూళ్ళలో అయితే పిల్లలకి కావలసిన స్పేస్ ఉంటుంది.. పిల్లలూ + కొంచం పెద్దలూ ఒకరి జ్ఞానాన్ని మరొకరు పంచుకొని తెలుసుకునే అవకాశం ఉంటుంది. అదే పట్టణాలలో అయితే పిల్లలకి కావలసిన స్పేస్ అండ్ టైం దొరకటం కష్టమే అనుకోవచ్చు.

ముఖ్యంగా మధ్యతరగతి కుంటుంబాలలో కామాన్ని నీచంగా చూడటం వల్ల జీవితపు దెబ్బలకి తట్టుకోలేని పరిస్థితుల్లో తల్లిదండ్రులుండటం వల్ల.. ఏమాత్రం చెడు పేరొచ్చినా సమాజం చులకనగా చూస్తుందనీ… చులకనలో బతకలేమని అనుకోవటం వల్ల ఆ మధ్యతరగతి పిల్లలకి ఈ విషయ జ్ఞానం అందటానికి అడ్డంకులు ఎదురవుతాయి. అయినా ఆగదు ఎందుకంటే మనసులోని ప్రోద్బలం ఊరుకోనివ్వదుగా… ఏదో దారి వెతుక్కుంటుంది ప్రవాహం.!

తాము టీనేజ్ నుంచే వచ్చినా ఆ వయసులో తమను కూడా వెంటాడిన అనుమానాలు.. మొలకెత్తిన కోరికలూ తల్లిడండ్రులకి గుర్తుంటాయా? గుర్తున్నా పిల్లలని గమనించి వాళ్లకి విశదీకరిస్తారా ?? టీనేజ్ కాలేజీలో ఉన్న యువతీ యువకుల మీద సినిమాలు కామన్. ప్రీటీన్ లవ్ స్టోరీస్ కూడా కొన్ని వచ్చాయి. మలీనా లాంటి అద్బుతమైన ప్రపంచ సినిమాలు ఉన్నాయి. తెలుగులో నోటు బుక్కు.. టెంత్ క్లాసు లాంటి సినిమాలూ వచ్చాయి.

అయితే ప్రీ టీన్ సెక్సువల్ ఇంట్రెస్ట్.. అండ్ సెక్స్ ఎడ్యుకేషన్ మీద అర్థవంతమైన సినిమా ఒక్కటి కూడా రాలేదనే చెప్పొచ్చు. ఎంతసేపూ అయితే హీరోఇజం.. లేదా టిటిలియేట్ చేసి డబ్బులు సంపాదిద్దాము అనే సినిమాలే తప్ప అర్థవంతమైన చిత్రాలు తీయొచ్చు.. తీసి జనాన్ని మెప్పించొచ్చు అనే సృహ ఉన్న దర్శక నిర్మాతలు బహు కొద్దిమందే కనక… ఇలాంటి సినిమాలు ఎప్పుడో కానీ రావు. ఇదుగో అలాంటి ఒక రేర్ సినిమాయే ఈ బాలక్ అండ్ పాలక్ అనే మరాఠీ సినిమా.

నగరజీవితం.. అపార్ట్‌మెంట్ సంసృతిలో ఓ ఫ్లాటు. తలుపులేసి మరీ పిల్లాడిని బాదుతూ ఉంటాడు తండ్రి. చదువుకోటానికి పుస్తకాలు.. ఆట సామగ్రీ.. హాబీకి గిటారు ఇలా అడిగినవన్నీ కొనిపెడితే ఇదట్రా నీవు చేసేదీ అంటూ. అటు తల్లికి ఎందుకు పిల్లాడిని కొడుతున్నాడో అర్థం కాదు.

ఇరవైనాల్గు గంటలూ వాడిని చూస్తోంది నీవు. ఏం చేస్తున్నాడో గమనిస్తున్నావా ? ఇదుగో ఇదీ మీ అబ్బాయి చేస్తున్న నిర్వాకం అని బూతు సీడీలు ఆమె చేతిలో పెడతాడు. విస్తుపోతుంది.. చిన్నపిల్లాడు ఇలా చేయటమేమిటీ అని. అసలు వాడు స్కూలికే వెళుతున్నాడా.. అక్కడేంచేస్తున్నాడో కనుక్కోవాలి అని అనగానే.. కథ గతంలోకి వెళుతుంది.

ఓ పల్లెటూరు.. డాలి, చివ్ అనే ఇద్దరమ్మాయిలు, భాగ్య, అవ్య అనే ఇద్దరబ్బాయిలూ.. ఈ నలుగురు ప్రీటీన్స్ లో ఉన్నపిల్లలు. ఒకే తరగతిలోని మిత్ర బృందం. ఎనిమిదో తొమ్మిదో చదువుతుంటారు. అర్ధ‌సంవత్సరం పరీక్షలు రాసి సెలవులన్న ఆనందంలో ఉత్సాహంగా కాలనీకి చేరుతారు. కానీ అదే సమయానికి కాలనీలో ఉంటున్న జ్యోతి అక్క వాళ్ళు కాలనీ వదిలి వెళ్ళి పోతుంటారు.

‘ఆ జ్యోతి ఇలా చేస్తుందని అనుకోలేదు. పైకి కనపడేంత అమాయకురాలేం కాదా పిల్ల.. ఈ రోజుల్లో తల్లిదండ్రులు పిల్లలని పట్టించుకుంటే కదా.. పైకి మంచి లోపల చెడు. చెప్పకూడదు కానీ పేడతినే రకం” అమ్మలక్కలు చెవులు కొరుక్కుంటుంటే ఈ పిల్లల చెవిలో పడతాయి. ఏం జరిగి ఉంటుంది.

ఎందుకు జ్యోతి అక్క వాళ్ళు కాలనీ విడిచి వెళ్లారు ?? పేడ తినటం అంటే అసలు అర్థమేమిటీ..? సెలవులు ముగిసేకల్లా కనుక్కొని తీరాల్సిందే అని కంకణం కట్టుకుంటారు నలుగురూ.. వారి వారి స్వంత ప్రయత్నాలు చేసి దెబ్బతిని.. చివరికి ఇలాంటి విషయాలు తెలిసేది క్లాసులో ఉండే “పరమశుంఠ” అయిన విషు గాడికే అని వాడి దగ్గరికి వెళతారు. వాడు క్లాసు పుస్తకాల్లో ఉన్న విషయాలు తప్ప జీవితంలోని విషయాలు బేషుగ్గా తెలుసు.

“జీవితానికి కావలసిన మూల విషయాలు అందరికీ సహజంగానే తెలుస్తాయి. వాటిని సరిగ్గా వాడుకోవటంలోనే తడబడుతుంటాం. విషయం పెద్దది.. దానికి ముందు మీరు తెలుసుకోవలసింది షానా ఉన్నది.. అని ‘ జ్ఞాన స బోధ‌ చేసే పుస్తకాలని అందిస్తాడు విషు వాళ్లకి.

అది మొదలు పిల్లలు కుతూహలంగా వాళ్ల వాళ్ళ పద్ధ‌తుల్లో పుస్తక పఠనం సాగిస్తుంటారు. ఆ కాలనీ పెద్దమనిషి వీళ్లని ఒక కంట కనిపెడుతూ ఉంటాడు. ఒకింత అనుమానం వచ్చి అవ్య తండ్రికి చెప్పినా అతను పట్టించుకోడు. అతనికి ఏదో జరుగుతోందని అనుమానం.

ఈ స్నేహితుల కోసం వస్తుంటే.. ఆ కాలనీలో నేహ అనే అందగత్తె విషు కళ్ల పడుతుంది. ఆ అమ్మాయి గురించి కామెంట్ చేయ బోతుంటే.. ఈ నలుగురు తిడతారు. అక్క లాంటిది అమె గురించి చెడు అని.. అప్పుడు మన విషు.. ” లోకంలో ఉన్నది ఆడ మగా.. అంతే… అందరి మనసుల్లో ‘అదే ‘విషయం ఉంటుంది. పైకి కనపడితే అసభ్యం.. రహస్యంగా అయితే సభ్య‌త. అంతే తేడా !! సరే సరే.. ఇహ పుస్తకాలు చదివింది చాలు.. ఇప్పుడు ప్రాక్టికల్‌గా అంటే దొంగచాటుగా చూసి తెలుసుకోవాలి మీరు అంటాడు.

అది తప్పుకాదా.. చూసేకదా తెల్సుకోవలసింది.. అయినా దీనికేమన్నా ట్యూషన్స్ ఉంటాయా .. జీవితంలో ఇలాంటి విషయాలు ఎవరికి వాళ్లే చూసీ.. చేసీ తెలుసుకోవాలి. ఇహ ఆ పనిలో పడతారు పిల్లలంతా… అదే ఈ సినిమా . మీరు మీ జీవితంలో పడ్డపాట్లని, మీకెదురొచ్చిన సంఘటనలనీ.. అనుభవాలనీ (జ్ఞానోదయాలన్ని) గుర్తుకు తెస్తూ.. ఆద్యంతం అసభ్య‌త లేకుండా హాస్య ధోరణిలో ఉత్సాహంగా సాగిపోతుందీ సినిమా.

పిల్లలు వ్యక్తులుగా ఎదగటం..స్నేహితుల మధ్య అపార్థాలు.. విడిపోవటం… క్షమాపణలూ.. కలయికలూ.. పెద్దల కోపతాపాలూ, ఏడుపులూ.. విషయ విశదీకరణ శక్తి లేమి.. అవగాహనా రాహిత్యం, ఎలా చెప్పాలో తెలియనితనం.. కలగలిసిన వివిధ భావోద్వేగాలు నిండుగా ఉన్న సినిమా ఇది. బాలక్ అండ్ పాలక్ అదే పిల్లలూ.. పిల్లలున్న పెద్దలూ తప్పక చూడాల్సిన సినిమా ఇది.

నటీనటులంతా సహజంగా చక్కగా నటించటంతో పాటూ.. అన్ని విభాగాల్లో ఆకట్టుకునే పనితనం కలిగి ఉంది ఈ సినిమా. ఈ మధ్య వ్యర్థ ద్వందార్థ సినిమాలు తీస్తున్న రితేష్ దేశ్ముక్ ఈ సినిమా నిర్మాతల్లో ఒకరు కావటం విశేషం.

పిల్లలు కలుగుతారు.. ఎప్పుడు ఏ టీకా వేయించాలో వేయిస్తాము. ప్రతి సంవత్సరం గొప్పగా పుట్టినరోజు వేడుకలు జరుపుతాము. మంచి స్కూల్లో వేయాలని తపన పడతాము. పండక్కి మనకున్నా లేకున్నా కొత్తబట్టలు పిల్లలకి ఉండాలని అనుకుంటాము. కానీ యుక్త వయసులో వాళ్లకి కలిగే ప్రశ్నలనీ.. ఆసక్తులనీ.. శారీరక ప్రోద్భలాలకి సంబంధించినవి మాత్రం పట్టించుకోము.

అడగజూస్తే కోప్పడతాం.. తెలుసుకోచూస్తే తప్పు అని అడ్డుకుంటాం.. చదువులో వెనకపడుతున్నాడని సైక్రియాట్రిస్ట్ దగ్గరికి తీసుకువేళతాం.. కానీ మనసులో జరుగుతున్నదేంటో గ్రహించం. చెడు అలవాట్లు అవుతున్నాయని వాపోతాం.. దానికి మూలకారణం ఏంటో తెలుసుకోం.

మతాలు చెప్పిన తప్పుడు సూత్రాలలో నీతి నియమ నిబంధ‌నల్లో పడి సహజాల్నీ.. సహజాతాలని అర్థం చేసుకోలేకపోతున్నాం. అందాల్సినవి అందనపుడు.. అందుకోచూస్తే… అడ్డుకట్ట వేస్తే.. అక్రమదారుల్లో ప్రవహిస్తుంది ప్రోద్భలం. అందుకే సక్రమంగా దారి చూపిస్తే అది పిల్లల జీవితానికీ.. పెద్దల ఆనందానికీ.. సమాజ శ్రేయస్సుకీ అన్నివిధాలుగా ఉపయుక్తం.

– Bhavani