వెంటనే హోంగార్డుల నియామకాలు చేపట్టండి: సీఎం రేవంత్ రెడ్డి
గ్రేటర్ హైదరాబాద్ పరిధిలో ట్రాఫిక్ నియంత్రణను అత్యంత ప్రాధాన్యతాంశంగా పోలీస్ విభాగం పరిగణించి ట్రాఫిక్ సమస్యల పరిష్కారానికి చర్యలు
- ట్రాఫిక్ సమస్యల నివారణకు వారిని కేటాయించండి
- రహదారులు.. జంక్షన్లను విస్తరించండి
- అండర్ పాస్‌లు.. సబ్‌వేలు నిర్మించండి
- ట్రాఫిక్ ప్రణాళికలు రూపొందించాలి
- ట్రాఫిక్ విభాగం సమీక్షలో రేవంత్ రెడ్డి
విధాత: గ్రేటర్ హైదరాబాద్ పరిధిలో ట్రాఫిక్ నియంత్రణను అత్యంత ప్రాధాన్య అంశంగా పోలీస్ విభాగం పరిగణించి ట్రాఫిక్ సమస్యల పరిష్కారానికి చర్యలు చేపట్టాలని సీఎం రేవంత్ రెడ్డి ఆదేశించారు. బుధవారం సచివాలయంలో ట్రాఫిక్ విభాగం అధికారులతో రేవంత్‌రెడ్డి సమీక్ష నిర్వహించారు. ఈ సందర్భంగా ఆయన మాట్లాడుతూ ట్రాఫిక్ సిబ్బంది కొరతను అధిగమించేందుకు వెంటనే తగినంత మంది హోంగార్డుల నియామకాలు చేపట్టాలని, ఇందుకు మూడు నెలల్లోగా ఈ ఏర్పాట్లు చేసుకోవాలని సూచించారు. వివిధ విభాగాల్లో పని చేస్తున్న హోంగార్డులను వెంటనే ట్రాఫిక్ విభాగానికి తిరిగి రప్పించాలని, తక్షణమే వారి సేవలను ట్రాఫిక్ నియంత్రణ విధులకు వాడుకోవాలని సూచించారు. ట్రాఫిక్ రద్దీ ఎక్కువగా ఉండే సమయాల్లో (పీక్ అవర్స్‌) లా అండ్ ఆర్డర్ పోలీసులను గ్రేటర్ సిటీ ట్రాఫిక్ కంట్రోల్ విధులకు వినియోగించుకోవాలని సూచించారు. ఇప్పుడున్న ట్రాఫిక్ పోలీస్ స్టేషన్ల స్థాయిని అప్ గ్రేడ్ చేయాలని, సరిపడే సంఖ్యలో సిబ్బంది ఉండేలా స్టేషన్లను పునర్వవస్థీకరించాలని ఆదేశించారు.
రహదారులు, జంక్షన్లు విస్తరించాలి
సిటీలో రహదారులు, జంక్షన్ల విస్తరణపై దృష్టి పెట్టాలని, రద్దీ ఎక్కువగా ఉండే జంక్షన్లలో ఎల్బీ నగర్ జంక్షన్ తరహాలో సబ్ వే, అండర్ పాస్, సర్ఫేస్ వే నిర్మాణాలు చేపట్టే అవకాశాలు పరిశీలించాలని సీఎం సూచించారు. సిటీ పరిధిలో అన్ని జంక్షన్లు, రద్దీ ఎక్కువగా ఉండే ప్రాంతాల్లో ఆటోమేటిక్ సిగ్నల్ వ్యవస్థ మీదే ఆధారపడకుండా ట్రాఫిక్ సిబ్బంది అక్కడ ఉండేలా ఏర్పాట్లు చేసుకోవాలన్నారు. హైదరాబాద్, సైబరాబాద్, రాచకొండ కమిషనరేట్ల పోలీస్ అధికారులు, మున్సిపల్ జోనల్ కమిషనర్లు సమన్వయంతో ట్రాఫిక్ నియంత్రణపై దృష్టి పెట్టాలని చెప్పారు. నెలకోసారి సమావేశమై ట్రాఫిక్ ఇబ్బందులు, వాటిని అధిగమించేందుకు తీసుకోవాల్సిన చర్యలను సమీక్షించాలన్నారు.
మల్టీలెవల్‌ పార్కింగ్ వ్యవస్థ
సిటీలో పార్కింగ్ సమస్యను అధిగమించేందుకు మల్టీ లెవల్ కార్ పార్కింగ్ సెంటర్ల నిర్మాణాన్ని ప్రోత్సహించాలని, అందుకు అవసరమైన ప్రత్యేక పార్కింగ్ పాలసీని రూపొందించాలని సీఎం రేవంత్‌రెడ్డి ఆదేశించారు. హైదరాబాద్ అభివృద్ధిని దృష్టిలో పెట్టుకొని భవిష్యత్తు అవసరాలకు అనుగుణంగా గ్రేటర్ సిటీలో ట్రాఫిక్ నియంత్రణ, నిర్వహణపై సమగ్ర ప్రణాళికను రూపొందించాలని, ఇందుకు కన్సల్టెన్సీలకు బాధ్యతలు అప్పగించి ప్రత్యేకంగా అధ్యయనం చేయించాలని ఆదేశించారు.
