ద‌స‌రాకు ఊరెళ్తున్నారా..? అయితే ఈ సూచ‌న‌లు త‌ప్ప‌క పాటించండి..!

విధాత‌: రాజ‌ధాని హైద‌రాబాద్ న‌గ‌రంలోని ప్ర‌తి ఒక్క‌రూ ద‌స‌రా పండుగ నేప‌థ్యంలో త‌మ సొంతూళ్ల‌కు వెళ్తున్నారు. ఇండ్ల‌కు తాళాలు వేసి ఊరి బాట ప‌ట్టారు. ఈ క్ర‌మంలో అలా సొంతూళ్ల‌కు వెళ్లే వారిని పోలీసులు అప్ర‌మ‌త్తం చేస్తున్నారు. వీలైతే న‌గ‌దు, ఆభ‌ర‌ణాల వంటి విలువైన వ‌స్తువుల‌ను వెంట తీసుకెళ్లాల‌ని సూచిస్తున్నారు. లేదంటే కొన్ని జాగ్ర‌త్త‌లు పాటిస్తే స‌రిపోతుంద‌ని సైబ‌రాబాద్ పోలీసులు సూచిస్తున్నారు.

పోలీసుల సూచ‌న‌లు ఇవే..

1. ఊరు వెళ్లాల్సి వస్తే మీ విలువైన బంగారు, వెండి, ఆభరణాలు, డబ్బులు, బ్యాంక్ లాకర్లలో భద్రపర్చుకోండి లేదంటే మీ ఇంట్లోనే రహస్య ప్రదేశంలో దాచుకోండి.
   
2. ఇల్లు విడిచి బయటకు వెళుతున్నప్పుడు సెక్యూరిటీ అలారం, మోషన్ సెన్సార్‌ను ఏర్పాటు చేసుకోవడం మంచిది.
3. మీ ఇంటికి సెంట్రల్ లాక్ సిస్టమ్ ఉన్న తాళం అమర్చుకోవడం మంచిది. తాళం వేసి ఊరికి వెళ్లాల్సి వస్తే మీ యొక్క స్థానిక పోలీసు స్టేషన్‎లో సమాచారం ఇవ్వండి.
4. మీ కాలనీలో ఎవరైనా అనుమానాస్పద వ్యక్తులు కనిపిస్తే వెంటనే స్థానిక పోలీసు స్టేషన్‎కు సమాచారం ఇవ్వండి లేదా డయల్ 100కు ఫోన్ చేయండి.
5. మీ వాహనాలను మీ ఇంటి ఆవరణలోనే పార్కు చేసుకొండి. మీ ద్విచక్ర వాహనాలకు తప్పనిసరిగా తాళాలు వేయండి. వీలైతే చక్రాలకు చైన్స్‎తో కూడా లాక్ వేయడం మంచిది.
6. నమ్మకమైన వాచ్‌మెన్‌లను మాత్రమే సెక్యూరిటీ గార్డులుగా నియమించుకోండి.
7. మీ ఇంట్లో అమర్చిన సీసీ కెమెరాలను ఆన్‎లైన్‎లో ఎప్పటికప్పుడు చూసుకుంటూ ఉండాలి.
8. మీరు ఇంట్లో లేనప్పుడు ఇంటి ముందు చెత్తా, చెదారం, న్యూస్ పేపర్స్, పాలప్యాకెట్లు జమకాకుండా చూసుకోవాలి. వాటిని కూడా గమనించి దొంగతనాలకు పాల్పడుతారు అనే విషయాన్ని గమనించండి.
9. మెయిన్ డోర్‎కి తాళం కప్ప వేసినప్పటికి అవి కనిపించకుండా కర్టెన్స్‎తో కవర్ చేయడం మంచిది.
10. బయటకు వెళ్లేటప్పుడు ఇంటి లోపల, బయట కొన్ని లైట్లు వేసివుంటే మంచిది.
11. మీ ఇంటి దగ్గర మీకు నమ్మకమైన ఇరుగు పొరుగు వాళ్ళకు మీరు ఇంట్లో లేని సమయంలో మీ ఇంటిని గమనిస్తు ఉండమని చెప్పడం మంచిది.
12. మీ ఇంటికి వచ్చే, వెళ్ళే దారులు మరియు ఇంటిలోపల సీసీ కెమెరాలు అమర్చుకొని డీవీఆర్ కనపడకుండా ఇంటి లోపల రహస్య ప్రదేశంలో ఉంచండి.
13. అల్మరా, కప్ బోర్డ్స్‎కు సంబంధించిన తాళాలు కామన్ ఏరియా అయిన చెప్పుల స్టాండ్, పరుపులు, దిండ్ల క్రింద, అల్మరా పైన, డ్రెస్సింగ్ టేబుల్‎లో, కప్ బోర్డ్స్‎లో ఉంచకుండా మీ ఇంట్లోనే రహస్య ప్రదేశంలో ఉంచడం మంచిది.
14. సోషల్ మీడియాలో మీరు బయటికి వెళ్లే విషయాన్ని ఇతరులకు షేర్ చేయడం మంచిది కాదు.
15. కాలనీల్లో దొంగతనాల నివారణకు స్వచ్ఛందంగా కమిటీలను నిర్వహించుకోవాలి.
16. మీకు ఎవరిమీదైనా అనుమానం వస్తే 100 టోల్ ఫ్రీ నెంబర్‎కు గాని, సైబరాబాద్ పోలీస్ కంట్రోల్ రూమ్ 9490617100కు లేదా మా వాట్సాప్ నెంబర్ 9490617444కు కాల్ చేయండి.