ఎమ్మెల్యే అరూరి ప్రలోభాలకు అడ్డంకి

• వాటర్ బాటిళ్లు, బ్యాగులు స్వాధీనం
  

విధాత, వరంగల్ ప్రత్యేక ప్రతినిధి: ఓటర్లను ప్రలోభాలకు గురిచేయడానికి వర్ధన్నపేట ఎమ్మెల్యే ఆరూరి రమేష్ చేసిన ప్రయత్నానికి ఎన్నికల అధికారులు అడ్డంకిగా నిలిచారు. ఓటర్ల పంపిణీ కోసం నిల్వచేసిన వాటర్ బాటిళ్లు, బ్యాగులు శనివారం స్వాధీనం చేసుకున్నారు.

వరంగల్ జిల్లా పర్వతగిరి మండలం సోమవారం గ్రామ సర్పంచి రాపాక రేణుక, నాగయ్య ఇంట్లో వాటర్ బాటిల్స్ , లంచ్ బాక్స్ లకు సంబంధించి బ్యాగ్స్ నిలువ చేశారని విశ్వసనీయ సమాచారం మేరకు ఎన్నికల స్పెషల్ ఫ్లయింగ్ స్కాడ్ అధికారులు దాడులు నిర్వహించారు.

ఈ దాడిలో బీఆర్ఎస్ పార్టీకి చెందిన 180 వాటర్ బాటిల్స్ , 280 బ్యాగ్స్ స్వాధీనం చేసుకొని కేసు నమోదు నిమిత్తం పర్వతగిరి పోలీసులకు అప్పగించినట్లు ఫ్లయింగ్ స్క్వాడ్ ఆఫీసర్ బాబురావు తెలిపారు. పార్టీకి సంబంధించిన వస్తువులు ఎవరైనా సరే ఇండ్లలో నిల్వ ఉంచుకుంటే ఎలక్షన్ కోడ్ కు సంబంధించి కేసులు నమోదు చేస్తామని ఆయన తెలిపారు.