World Hepatitis Day విధాత: ఆల్కహాల్ ఎక్కువగా తాగితే కాలేయం పాడవుతుందని మనకు తెలుసు. కానీ ఇన్ ఫెక్షన్ల వల్ల కూడా కాలేయం దెబ్బతింటుంది. అవే హెపటైటిస్ ఇన్ ఫెక్షన్లు. ఆల్కహాలిక్స్ లో హెపటైటిస్ ఇన్ ఫెక్షన్లు వస్తే.. ఇక మరింత ప్రమాదం. కొన్నిసార్లు కామెర్లే కదా అని నిర్లక్ష్యం చేస్తే ప్రాణానికే ప్రమాదం కలగొచ్చు. ఈరోజు అంటే జూలై 28న వరల్డ్ హెపటైటిస్ డే సందర్భంగా హెపటైటిస్ నుంచి జాగ్రత్తపడటానికి ఇది తప్పనిసరిగా చదవండి. ఒక […]
World Hepatitis Day
విధాత: ఆల్కహాల్ ఎక్కువగా తాగితే కాలేయం పాడవుతుందని మనకు తెలుసు. కానీ ఇన్ ఫెక్షన్ల వల్ల కూడా కాలేయం దెబ్బతింటుంది. అవే హెపటైటిస్ ఇన్ ఫెక్షన్లు. ఆల్కహాలిక్స్ లో హెపటైటిస్ ఇన్ ఫెక్షన్లు వస్తే.. ఇక మరింత ప్రమాదం. కొన్నిసార్లు కామెర్లే కదా అని నిర్లక్ష్యం చేస్తే ప్రాణానికే ప్రమాదం కలగొచ్చు. ఈరోజు అంటే జూలై 28న వరల్డ్ హెపటైటిస్ డే సందర్భంగా హెపటైటిస్ నుంచి జాగ్రత్తపడటానికి ఇది తప్పనిసరిగా చదవండి.
ఒక చిన్న వైరస్ శరీరంలో అతి పెద్ద అవయవమైన కాలేయాన్ని దెబ్బతీస్తుంది. అదే.. హెపటైటిస్ వైరస్. ఈ వైరస్ లు ముఖ్యంగా నాలుగు రకాలుంటాయి. వీటిలో సాధారణంగా కనిపించేవి హెపటైటిస్ ఎ, హెపటైటిస్ ఇ ఇన్ ఫెక్షన్లు. హెపటైటిస్ బి, హెపటైటిస్ సి కూడా కొంచెం ఎక్కువే. మన భారతీయుల్లో 2.5 శాతం మందిలో హెపటైటిస్ బి, 1 శాతం మందిలో హెపటైటిస్ సి ఇన్ ఫెక్షన్లు ఉన్నాయని అంచనా.
హెపటైటిస్ ఎ, ఇ వైరస్ లు కలుషిత ఆహారం, నీరు తీసుకోవడం వల్ల వస్తాయి. అందుకే వర్షాకాలంలో ఈ రకమైన ఇన్ ఫెక్షన్లు ఎక్కువగా కనిపిస్తుంటాయి. సాధారణంగా ఇవి పదిహేను రోజుల్లో వాటికవే తగ్గి పోతుంటాయి. కానీ హెపటైటిస్ బి, సి వైరస్ లు మాత్రం రక్తం ద్వారా ఒకరి నుంచి ఒకరికి వ్యాపిస్తాయి.
స్టెరిలైజ్ చేయని నీడిల్స్, రేజర్స్ వాడటం ఇందుకు ముఖ్య కారణం. సరైన బ్లడ్ బ్యాంకుల నుంచి రక్తం తీసుకోకపోవడం కూడా ఇవి సోకడానికి కారణమవుతుంది. సెక్సువల్ కాంటాక్ట్ వల్ల కూడా హెపటైటిస్ బి, సి వైరస్ లు వ్యాపిస్తాయి. తల్లికి హెపటైటిస్ బి, సి ఉంటే బిడ్డకు రావచ్చు.
హెపటైటిస్ ఎ, లేదా ఇ ఉన్నప్పుడు వెంటనే జ్వరం, కామెర్లు వంటి లక్షణాలు కనిపిస్తాయి. కానీ హెపటైటిస్ బి లేదా సి ఇన్ ఫెక్షన్ ఉన్నప్పుడు వ్యాధి ముదిరేవరకు లక్షణాలుండవు. లివర్ గట్టిపడి దెబ్బతినడం మొదలైతే తప్ప ఈ ఇన్ ఫెక్షన్ ఉందని గుర్తించలేరు. అందుకే ప్రతి ఒక్కరూ హెపటైటిస్ బి కోసం హెచ్ బిఎస్ఎజి అనే టెస్టు, హెపటైటిస్ సి కోసం యాంటీ హెచ్ సివి టెస్టు చేయించుకుంటే వీటిని ముందుగానే గుర్తించవచ్చు.
హెపటైటిస్ ఎ, ఇ లు సాధారణంగా వాటికవే తగ్గిపోతాయి. లేకపోయినా మందులతో నయం అవుతాయి. హెపటైటిస్ సి ఇన్ ఫెక్షన్ ను కూడా పూర్తిగా నయం చేయవచ్చు. శరీరంలో ఈ వైరస్ అసలే లేకుండా చేయవచ్చు.
కానీ హెపటైటిస్ బి కి మాత్రం పూర్తి స్థాయి చికిత్స ఇప్పటివరకూ లేదు. కానీ వైరస్ ల సంఖ్య తగ్గించడం ద్వారా అది లివర్ ని డ్యామేజీ చేయకుండా, ఇతరులకు వ్యాపించకుండా జాగ్రత్తపడొచ్చు. అయితే వీటిని ఎంత తొందరగా గుర్తిస్తే అంత మంచిది. అంత త్వరగా లివర్ పాడైపోకుండా కాపాడుకోవచ్చు.
జాండిస్ వచ్చిందని పసరు మందులు, నాటు మందులు వాడేవాళ్లలో కామెర్లు తగ్గిపోవడానికి కారణం ఈ ఇన్ ఫెక్షన్లే. నిజానికి అవి ఆ పసరు మందులు వాడకపోయినా తగ్గిపోతాయి. కానీ పసరు మందుల వల్ల మాత్రం కిడ్నీ ఫెయిల్యూర్, లివర్ ఫెయిల్యూర్, బోన్ మ్యారో ఫెయిల్యూర్ లాంటి కాంప్లికేషన్లు రావచ్చు.
హెపటైటిస్ బి కి వ్యాక్సిన్ అందుబాటులో ఉంది. 2011 నుంచి పుట్టిన ప్రతివారికీ మూడు డోసుల్లో వ్యాక్సిన్ ని తప్పనిసరి చేశారు. దానికన్నా ముందు పుట్టిన వాళ్లు కూడా ఏ వయసులో అయినా ఈ వ్యాక్సిన్ ని వేయించుకోవచ్చు. దీని ధర కూడా చాలా తక్కువ.
ఇకపోతే, హెపటైటిస్ ఎ, ఇ రాకుండా ఉండాలంటే బయటితిండి తినకుండా ఇంటి ఫుడ్ తీసుకోవడమే మార్గం. పానీపూరీలు, రోడ్డు మీది స్నాక్స్ లాంటివి తినకూడదు. కాచి వడబోసిన నీటినే తాగాలి. ఇలాంటి జాగ్రత్తలు తీసుకుంటే హెపటైటిస్ మాత్రమే కాదు, ఇతరత్రా ఇన్ ఫెక్షన్లు రాకుండా కూడా నివారొంచవచ్చు.
డాక్టర్ కె. ఎస్. సోమశేఖర్ రావు,
మెడికల్ గ్యాస్ట్రో ఎంటరాలజిస్ట్&హెపటాలజిస్ట్.
యశోద హాస్పిటల్, హైదరాబాద్.